نص تحقيقات مباحث افش الفرخة مع المدعوة كوكى ابو ريشة

نص تحقيقات مباحث افش الفرخة مع المدعوة كوكى ابو ريشة المتهمة فى القضية رقم 456 محكمة انفلونزا الطيور العليا !!



- اسمك وسنك؟!
كوكى ابو ريشة كاكى / 22يوم

- محل الاقامة؟!
عشة ام سيد المتفرع من سطوح بيت عم الحاج ابو رجب

- ما قولك فما هو منسوب اليكى من انك مصابة بفيروس انفلونزا الطيور
ما حصلشى !!


- ولكن جميع الاوراق الرسمية وتقارير الطب البيطرى تشير لانك مصابة بالفيروس ؟؟
يا باشا صدق العليل وما تصدقشى التحليل وبعدين التقارير دى كلها مضروبة ام سيد اللى مزوراها عند عبده الفراخجى

- وما هى مصلحتها فى ادعائها هذا عليك ؟
البلاغ ده كيدى يا باشا بتنتقم منى عشان انا فرخة شريفة مش عاوزة ابيض



- وما سر امتناعك عن البيض؟!
ما بحبوش ما بطقوش هو بالعافية يعنى

- مين ؟!
بسلامته ديك البرابر كوكو ابو عرف

- وهل تتهميه بالبلاغ الكيدى ضدك ؟!
ايوه ومش هو وبس معاه كمان ام سيد هو اللى وزها ........الفرخة اللى ما بتطوعوش بيكرى عليها عندها

- ولكن اوراق القضية تحمل شهادة بانك كنتى منتجة للبيض بشكل غزير وتم وقف خط الانتاج بتاريخ 29/2/2006
نفس تاريخ الاعلان عن انفلونزا الطيور
- يا باشا صدقنى انا لسة عذراء وهفضل عذراء

- ليه هتترهبنى ؟!

لا يا باشا بس انا وعدته لنبيض سوا لنموت سوا


- مين ؟!

لولو يا باشا ......ده ديك احلامى جارنا اللى فى عشة ام صبرى متربين من صغرنا مع بعض ايام ما كانت العلاقة كويسة بين ام سيد وام صبرى كنا نخرج كلنا نتهوى ونتشمس وناكل و نلقط الحب وننكش برجلينا فى الارض مع بعض ونلعب ونغنى كوكو واوا ........سطوحنا كان مفتوح على سطوحهم ومن هنا بدات قصة حبنا الطاهر الشريف

- وهل وقفت ام سيد فى طريق اتمام مشروع زواجكم ؟!
الصراحة يا باشا هى كانت موافقة وما كنتشى ممانعة ابدا لكن بسبب خلاف بينه وبين ام صبرى بعد حادثة اختفاء بحة الضكر كل شى ء اتغير


- مين المدعو بحة الضكر ؟1
ده كان زينة شباب البط فى العشة واختفى فى ظروف غامضة وبعد اربع ايام لقينا ريشه متلقح فى منور العمارة فاتهمت ام سيد ام صبرى بانها هى اللى خطفته ودبحته فى دخلة بنتها انعام ومن ساعتها والعلاقة متوترة بينهم



- هل لديكى اقوال اخرى؟!
ايوه انا عاوزة كوكو يمضى اقرار على نفسه بعدم التعرض ليا وبطلب كمان حق اللجوء السياسى لمزارع الفراخ البيضا التابعة لهيئة الدواجن العامة


وعليه امرنا نحن باستدعاء كل من ام سيد وكوكو ابو عرف للتحقيق معهم بشان الاتهامات الموجهة اليهم مع التحفظ على المدعوة كوكى داخل احدى مزارع الفراخ البيضا لحين الانتهاء من القضية ينفذ فى ساعته وتاريخه